NATO po vendos forca shtesë në Kosovë

Komanda e Forcave të Përbashkëta të NATO-s në Napoli ka njoftuar se ka filluar vendosja e forcave shtesë në Kosovë në mbështetje të forcave të KFOR-it.

“NATO po vendos forca shtesë në Kosovë si kundërpërgjigje ndaj trazirave të fundit dhe plagosjes së 30 pjesëtarëve të forcave të NATO-s për Kosovën. NATO ka urdhëruar vendosjen e Rezervës Operative të forcave të saj (ORF) për Ballkanin Perëndimor, të cilat ishin në gatishmëri shtatëditore”, thuhet në deklaratën e Komandës së Forcave të Përbashkëta në Twitter.

Batalioni Shtesë i Forcave Rezervë Shumëkombëshe u urdhërua të zvogëlojë statusin e gatishmërisë për dislokim nga katërmbëdhjetë ditë në shtatë ditë, në mënyrë që të jenë të gatshëm për të përforcuar KFOR-in nëse është e nevojshme.

"Venosja e forcave shtesë të NATO-s në Kosovë është një masë e kujdesshme për të siguruar që KFOR-i ka kapacitetet që i nevojiten për të ruajtur sigurinë në përputhje me mandatin tonë nga Këshilli i Sigurimit i OKB-së. Dua të përgëzoj KFOR-in për veprimet e shpejta, të përmbajtura dhe profesionale për të ndalur trazirat dhe për të shpëtuar jetë. Dhuna duhet të ndalet dhe të gjitha palët duhet të ndalojnë së ndërmarrë veprime që cenojnë paqen në të gjitha komunitetet në Kosovë”, tha komandanti i Komandës së Forcave të Përbashkëta Aleate në Napoli, Admirali Stjuart Manç.

Komanda e NATO-s në Napoli deklaroi se po monitoron nga afër situatën në Kosovë dhe do të vazhdojë të koordinohet me KFOR-in për t'u siguruar që ai ka të gjitha forcat dhe aftësitë e nevojshme që i nevojiten për të ofruar në mënyrë të paanshme një mjedis të sigurt dhe lirinë e lëvizjes për të gjitha komunitetet dhe në përputhje me mandatin e saj bazuar në Rezolutën 1244 të Këshillit të Sigurimit të OKB-së nga viti 1999.