Petriç për largimin e mundshëm të Lajçakut: Çdo ndryshim i shpejtë është problem, por do të gjendej një zëvendësim afatshkurtër

Ish-i dërguari i Bashkimit Evropian për Kosovën, Volfgang Petriç, beson se largimi eventual i Miroslav Lajçakut nga posti i të dërguarit special të Bashkimit për dialogun ndërmjet Beogradit dhe Prishtinës, në rast se ai vendos të kthehet në politikën sllovake, do të ishte problem, por do të gjendej zëvendësimi afatshkurtër.

I pyetur nëse do të ishte problem për dialogun nëse, pas zgjedhjeve të fundit në Sllovaki, Lajçak vendos të kthehet në qeverinë e Bratislavës, Petriç tha për Kosovo online se çdo ndryshim i shpejtë është problem.

"Çdo ndryshim i shpejtë është një problem. Lajçak ka një ekip të mirëkoordinuar. Besoj se në afat të shkurtër mund të gjendet një zëvendësim që të paktën të ruajë minimumin për ruajtjen e dialogut. Nuk e di se çfarë do të ndodhë me Lajçakun, nëse ai do të kthehet në Sllovaki ose do të qëndrojë në pozicionin e tij në EU, por pavarësisht kësaj, BE duhet të sigurojë që dialogu, nëse të dyja palët dëshirojnë, mund të vazhdojë”, tha Petriç.

Petriç beson se procesi i dialogut do të ndikohet nga zgjedhjet e ardhshme.

“Në dhjetor u shpallën zgjedhjet në Serbi, pasuan zgjedhjet në Kosovë, në SHBA dhe në Parlamentin Evropian. Pas kësaj do të vijojë formimi i Komisionit të ri Evropian, si dhe zëvendësimi i kreut të diplomacisë evropiane dhe personit që do të udhëheqë dialogun”, shtoi ai.