Rajiq: Me Kurtin në pushtet nuk mund të pritet që të zbatohet asnjë marrëveshje

Për sa kohë që Albin Kurti është në pushtet në Prishtinë, nuk mund të presim që të zbatohet asnjë marrëveshje që është nënshkruar dhe rënë dakord apo harmonizuar më herët dhe nuk mund të presim që të arrihet ndonjë marrëveshje e re që do të ishte në dobi të popullit serb, thotë për Kosovo online analisti Predrag Rajiq, me rastin e dyvjetorit të marrëveshjes ndërmjet Beogradit dhe Prishtinës për Marrëveshjen për rrugën drejt normalizimit, e arritur në kuadër të dialogut në Bruksel.

Rajiq nuk është optimist se çdo marrëveshje nga dialogu do të zbatohet plotësisht përderisa Kurti është në pushtet apo se do të ketë mundësi për të rënë dakord për diçka që do të jetë e qëndrueshme, përderisa, siç thotë ai, fjalën e fundit kur është fjala për shqiptarët në Prishtinë, e ka Kurti.

“Kurti është ekstremist dhe jashtëzakonisht radikal dhe e gjithë politika e tij ka për qëllim marrjen e të drejtave të serbëve dhe dërrmimin politik të komunitetit serb në Kosovë dhe Metohi, dhe se ai vazhdimisht e paraqet shtetin e Serbisë dhe popullin serb si armiq të shqiptarëve në Kosovë dhe Metohi dhe se me atë populizëm të lirë, demagogji dhe skllavërinë e tyre ndaj shqiptarëve në Kosovë dhe me shauinizëm mbajë në anën e tij në atë mënyrë, duke u paraqitur si mbrojtës nga ai faktor që ai e cilëson si armiqësor, e ky është faktori serb. Kurti dëshiron të mbulojë mungesën e suksesit të tij në fusha të tjera, kur bëhet fjalë për luftimin e korrupsionit, ndërtimin e infrastrukturës apo forcimin e ekonomisë, pikërisht me këto lloj pozicionesh”, thotë Rajiq.

Sipas vlerësimit të tij, Bashkimi Evropian si ndërmjetës në dialog do të duhej të ushtronte presion shumë më të fortë ndaj Kurtit se më parë, në mënyrë që ai të ndryshojë qëndrim.

"Doli se këto ishin disa presione kozmetike sipërfaqësore, asnjëra prej të cilave nuk mund të jepte rezultate. Nëse Bashkimi Evropian vërtet dëshiron ndryshim, duhet të jetë shumë më radikal ndaj Kurtit, por nuk shoh se ka një konsensus për këtë mes shteteve anëtare të BE-së. Një numër i tyre sigurisht që do ta bllokonin një qasje të tillë, për më tepër, tashmë ka shtete që haptazi avokojnë për heqjen e të gjitha masave kufizuese ndaj Prishtinës, përkundër faktit se Prishtina nuk ka ndryshuar aspak sjelljen e saj dhe për shkak të asaj sjelljeje janë futur këto masa kufizuese”, thotë bashkëbiseduesi ynë.

Të vetmit që mund të ndryshojnë gjendjen e punëve dhe ta bindin Prishtinën të sillet ndryshe, beson ai, janë amerikanët.

“Shpresa ime e vetme është se ndoshta Kurti do të detyrohet të veprojë ndryshe ose ndoshta një qeveri tjetër në Prishtinë do të sillet pak më ndryshe nën presionin e amerikanëve. Është i vetmi entitet që ka mjaftueshëm instrumente për të bindur shqiptarët të fillojnë të bëjnë diçka ndryshe. BE-ja është 28 shtete, një konglomerat, ku keni pikëpamje krejt të ndryshme dhe që ata të bien dakord për një politikë më radikale, duhet të ndodhë një mrekulli dhe kam frikë se në këtë kontekst, mrekullitë ndodhin rrallë”, thekson Rajiq.

I pyetur nëse administrata e re amerikane do të fokusohet në zbatimin e Marrëveshjes për rrugën drejt normalizimit apo do të kërkojë arritjen e marrëveshjeve të reja mes dy palëve, Rajiq thotë se të dyja janë të mundshme.

“Nuk do të habitesha nëse ata përpiqen të iniciojnë një marrëveshje të re që do të përfshijë disa të mëparshme ose elemente të disa të mëparshmeve. Natyrisht, ne vazhdojmë të insistojmë në përmbushjen e asaj që është nënshkruar në Bruksel në vitin 2015 dhe po flasim për Asociacionin e Komunave Serbe, kjo është kërkesa jonë përfundimtare dhe ne nuk heqim dorë nga ajo. Ne e dimë se edhe Marrëveshja e Uashingtonit thoshte se do të zbatohej ajo që ishte nënshkruar më herët në Bruksel, por asnjë nga këto nuk u bë nga Prishtina dhe ne kemi bërë gjithçka që ishte në dorën tonë. Nëse amerikanët do të krijonin një marrëveshje të re, ajo sigurisht që do të përbëhej kryesisht nga elementë të marrëveshjeve të mëparshme, dhe unë besoj në atë qasje proaktive ndaj politikës amerikane dhe mendoj se Serbia ka ditë shumë të mira përpara në marrëdhëniet me amerikanët, kjo është gjendja e natyrshme e gjërave”, thotë Rajiq.

Për pjesën më të madhe të historisë, shton ai, serbët kanë qenë aleatë me amerikanët dhe kulturat e tyre janë të pajtueshme. “Periudha e trishtuar”, siç thotë ai, e viteve 1990 dhe ajo që pasoi pas atyre viteve ishte një epokë fatkeqe, por tani po kthehet gjendja e natyrshme e gjërave, e cila është që serbët dhe amerikanët të jenë edhe një herë miq, partnerë të mirë, madje edhe aleatë.

“Dhe nëse është kështu, atëherë unë besoj se sigurisht që mund të respektojmë atë që fillimisht është minimumi, e më vonë optimumi, i interesave kombëtare serbe, kudo, përfshirë edhe në Kosovë dhe Metohi”, përfundon Rajiq.