Shtiplija: Është herët të dërgohet pyetësori i Komisionit Evropian për anëtarësimin e Kosovës në BE

Drejtori i Qendrës për Politikë Bashkëkohore dhe redaktori i portalit Juropian Western Balkans, Nemanja Todoroviq Shtiplija, thotë për Kosovo online se në rrethanat aktuale nuk e sheh mundësinë që Këshilli i Bashkimit Evropian t'i japë Kosovës statusin e kandidatit për anëtarësimin në BE.

Kosova ka dorëzuar kërkesën për anëtarësim në Bashkimin Evropian dy vite më parë, më 15 dhjetor 2022, dhe përfaqësuesit e Qeverisë së Kosovës besojnë se është koha që kjo kërkesë të merret në konsideratë. Shtiplija, megjithatë, thotë se edhe pse në vitet e mëparshme mund të pritej që Kosova të jetë kandidate për anëtarësim në BE, nuk ka një pasqyrë të qartë të hapave të ardhshëm të Këshillit të BE-së në këtë rast.

“Kjo për shkak se ka masa kufizuese të BE-së ndaj Kosovës dhe për shkak se ka një ngërç në dialogun ndërmjet Beogradit dhe Prishtinës, ku Kosova qartazi nuk i përmbush të gjitha marrëveshjet nga dialogu. Askush nuk e priste që procesi i dialogut do të zgjaste kaq shumë dhe se nuk do të arrijmë një marrëveshje ligjërisht të detyrueshme. Në anën tjetër, nuk e dimë se çfarë qëndrimi do të mbajnë shtetet anëtare të BE-së që nuk e kanë njohur Kosovën kur të merren vendimet brenda Këshillit. Ndoshta kjo është arsyeja pse ata janë kundër anëtarësimit të saj. Sigurisht, hapi i ardhshëm është që Këshilli t'i japë Kosovës disa udhëzime formale apo joformale në mënyrë që aplikimi për anëtarësim të bëhet i besueshëm”, thekson Shtiplija.

Më vonë, kur Këshilli i BE-së jep dritën jeshile, shton ai, Komisioni Evropian hyn në procesin e analizës nëse Kosova mund të bëhet kandidate për anëtarësim.

“Aty hapi i parë është sigurisht Pyetësori me më shumë se 3000 pyetje që Kosova duhet t'i marrë nga Komisioni Evropian, por nga këndvështrimi i sotëm duket se është herët për të gjitha këto”, thotë bashkëbiseduesi ynë.

Shtiplija thotë gjithashtu se që nga fillimi i agresionit rus kundër Ukrainës, entuziazmi për pranimin e anëtarëve të rinj në BE është rritur mjaft, gjë që ka çuar në faktin se disa vende, disa prej të cilave kanë qenë në proces më gjatë dhe disa më të shkurtër, kanë marrë statusin e kandidatit dhe që realisht presin që kjo të ndodhë edhe në Kosovë, por vëren se ka edhe probleme.

“Qeveria e Kosovës përmend disa suksese në periudhën e kaluar që mund të sjellin që Kosova të marrë pyetësorin e KE-së, por në disa situata ka probleme, siç është rasti me agjendën e reformave. Është e vërtetë që Kosova ka qenë ndër vendet e para që ka dorëzuar agjendën e reformave në KE, por baza e agjendës së reformave, që është qasja në tregun e përbashkët, përmes tregut të përbashkët rajonal, është diçka që është pengesë për Kosovën për momentin. Ne e dimë qëndrimin e Gjermanisë se Kosova nuk i plotëson të gjitha kushtet, gjegjësisht se nuk dëshiron t'i plotësojë të gjitha kushtet për qasje para së gjithash në tregun e përbashkët përmes Cefta-s. Pra, nuk shoh se Kosova mund të këtë lëshime për ndonjë hap të mëtejshëm si integrimi evropian, pra drejt statusit kandidat”, përfundon Shtiplija.