Sorensen: Me Gjuriqin mbi rëndësinë e angazhimit të vazhdueshëm në dialog

Përfaqësuesi special i BE-së për dialogun midis Beogradit dhe Prishtines, Peter Sorensen, u takua dje me Ministrin e Punëve të Jashtme, Marko Gjuriq, me të cilin diskutoi zbatimin e Marrëveshjes së Ohrit dhe promovimin e normalizimit ekonomik.

"Diskutuam rëndësinë e angazhimit të vazhdueshëm në dialog me ndërmjetësimin e Bashkimit Evropian me qëllim zbatimin e të gjitha marrëveshjeve të arritura, përfshirë Marrëveshjen e Ohrit nga viti 2023, si dhe avancimin e normalizimit ekonomik që duhet të përmirësojë jetën e përditshme të qytetarëve", tha Sorensen në rrjetin "X".

Gjuriq tha të premten se i përcolli Sorensenit se Beogradi është i përkushtuar ndaj dialogut dhe se shpreson që kushtet për vazhdimin e tij të përmbushen së shpejti, dhe theksoi se Asociacioni i Komunave Serbe mbetet një përparësi. Ai gjithashtu shprehu shpresën se bisedimet e nivelit të lartë do të zhvillohen së shpejti.