Staroviq: Besojmë te forcat e KFOR-it për të ndaluar ndërtimin e dy urave të reja mbi Ibër

Ministri për Integrime Evropiane i Serbisë, Nemanja Staroviq, deklaroi se procesi i dialogut ndërmjet Beogradit dhe Prishtinës është në krizë që nga momenti kur, sipas tij, Albin Kurti është në krye të institucioneve të Prishtinës.

Staroviq theksoi se Serbia mbështetet te forcat e KFOR-it për të ndalur, siç tha, lëvizjen më të fundit përshkallëzuese të Kurtit, përpjekjen për ndërtimin e dy urave të reja mbi lumin Ibër.

Duke qenë mysafir në televizionin “Newsmax”, Staroviq theksoi se është krijuar një model masash të njëanshme, përmes të cilave procesi i dialogut midis Beogradit dhe Prishtinës injorohet plotësisht.

“Këto masa të njëanshme i kanë shkaktuar dëme popullit serb dhe kanë dy synime – i pari është shtimi i presionit ndaj popullatës serbe që të shpërngulet nga territori i Kosovës dhe Metohisë, dhe fatkeqësisht, rreth 15 për qind janë shpërngulur gjatë disa viteve të fundit që kur ai është në krye të institucioneve. Qëllimi i dytë është të provokohen reagime nga Serbia, të cilat do të na tërhiqnin në luftë – një luftë në të cilën, sipas një modeli të përcaktuar paraprakisht, NATO do të ishte në anën e Albin Kurtit, pa marrë parasysh shkakun apo kush e ka provokuar konfliktin,” deklaroi ministri.

Staroviq tregoi se Serbia mbështetet te forcat e KFOR-it për të penguar përpjekjen për ndërtimin e edhe dy urave të tjera mbi lumin Ibër.

“Ajo që ne mund të bëjmë në këto rrethana aspak të lehta është të vazhdojmë dhe të shtojmë mbështetjen për popullatën tonë, sepse besoj se pothuajse nuk ka shtëpi apo familje serbe në Kosovë dhe Metohi që në një mënyrë apo në një tjetër nuk merr ndihmë nga Serbia, dhe me këtë do të vazhdojmë me siguri. Ajo në të cilën mbështetemi, për fat të keq jo shumë, është Bashkimi Evropian në këtë situatë. Por forca që mundet dhe e ka treguar që mund të ndalë veprimet më përshkallëzuese të Kurtit, dhe aktualisht kjo është përpjekja për ndërtimin e dy urave të tjera mbi Ibër, janë forcat e KFOR-it, të cilat janë përgjegjëse për paqen, sigurinë dhe mbrojtjen e popullsisë më të rrezikuar. Shpresoj që pikërisht këto forca do ta ndalin Kurtin në këtë,” theksoi ai.