Troude: Autoritetet në Prishtinë nuk kanë më mbështetje as nga qeveria shqiptare, e as nga amerikanët

Historiani francez dhe profesori i gjeopolitikës në Universitetin e Versajës, Alexis Troude, konsideron se pushteti në Prishtinë nuk ka më mbështetje as nga qeveria shqiptare, as nga amerikanët.

Në një intervistë për RTS me rastin e publikimit të librit të tij “Serbët dhe Francezët – Fati i ndërthurur”, historiani dhe profesori francez thotë se historia po kthehet kundër pushtetit në Prishtinë.

“Çështja e Kosovës është me të vërtetë një gjemb në këmbën e Serbisë, sepse është e qartë se në fund, pas 33 kapitujve të negociatave me Bashkimin Evropian, kapitulli i 34-t dhe i fundit do të jetë kërkesa që Serbia të heqë dorë nga provincia e saj, Kosova dhe Metohija, në këmbim të anëtarësimit në BE. Ky do të jetë një moment shumë i vështirë për serbët dhe sinqerisht e kam frikën. Në periudhën e ardhshme, pavarësisht gjithçkaje që ka ndodhur – përfshirë vendosjen e kryetarëve shqiptarë të zgjedhur me më pak se dy për qind të trupit votues, si dhe të gjithë politikën poshtëruese të qeverisë në Prishtinë – shihet qartë se autoritetet në Prishtinë nuk kanë më mbështetje as nga qeveria shqiptare, e as nga amerikanët. Historia po kthehet kundër tyre”, thotë Troude.

Ai thekson se në Prishtinë po shpërthejnë skandale korrupsioni dhe se opozita po bëhet gjithnjë e më nervoze, prandaj shpreson që në një kontekst të tillë presioni ndaj serbëve, që për shumë vite ka qenë shumë i fortë dhe intensiv, më në fund të fillojë të dobësohet.

“Kam pasur rastin të sjell eurodeputetë, i fundit ishte miku im Nicolas Bay, i cili pa personalisht se në çfarë mënyre pushteti në Prishtinë ushtron presion dhe kufizon popullsinë serbe. Shpresoj që ky presion të lehtësohet dhe t’u mundësohet serbëve, Listës Serbe, por edhe të tjerëve, të dalin në zgjedhje në mënyrë demokratike dhe të zgjedhin të paktën një pushtet pak më të moderuar.”