Vuçeviq: Kurti vazhdon terrorin ndaj serbëve i revoltuar nga dështimi për të ndaluar Listën Serbe

Kryeministri i Serbisë, Millosh Vuçeviq, ka reaguar pas bastisjes së sotme të Policisë së Kosovës në zyrat e Ndërmarrjes Shoqërore Urbanizëm në Mitrovicën e Veriut, duke theksuar se kryeministri i Kosovës, Albin Kurti, vazhdon terrorin ndaj serbëve dhe, siç thotë ai, shfrytëzon festat për të çuar më tej skenarin e tij terrorist dhe grabitjen e paligjshme të pronës serbe në veri të Kosovës.

Vuçeviq ka shkruar në Instagram se veprimet e Policisë së Kosovës janë dëshmi e pafuqisë së kryeministrit të Kosovës.

„Sërish shohim pamje të turpshme të pafuqisë së Kurtit. Ai vazhdon terrorin ndaj serbëve dhe shfrytëzon festat për të çuar më tej skenarin e tij terrorist dhe grabitjen e paligjshme të pronës serbe në veri të Kosovës dhe Metohisë. Forcat speciale të Kurtit kanë hyrë në objektin e Ndërmarrjes Shoqërore Urbanizëm në Mitrovicën e Veriut. Në këtë moment, ata po konfiskojnë gjëra nga objekti serb ku punojnë rreth dhjetë punëtorë,“ ka shkruar Vuçeviq.

Ai thekson se është plotësisht e qartë se Kurti është i revoltuar nga dështimi i tij për të ndaluar Listën Serbe.

„Asnjë përpjekje për të eliminuar serbët nga jeta politike nuk i ka funksionuar, kështu që tani po përpiqet me të gjitha mënyrat të ushtrojë presion ndaj popullit serb në veri të Kosovës dhe Metohisë. E gjithë bota po fillon të kuptojë se kush po krijon probleme dhe kush po përpiqet të destabilizojë rajonin me veprime të njëanshme në Kosovë dhe Metohi. Serbia do të sillet me përgjegjësi dhe do të përpiqet në çdo mënyrë të ruajë paqen,“ ka theksuar kryeministri i Serbisë.